कोभिड-१९ अस्पतालमा करारका स्वास्थ्यकर्मीले अब तलब नपाउने

काठमाडौं : कोरोना संक्रमण नियन्त्रण तथा संक्रमितको उपचारका लागि भन्दै ल्याइएको ६४९ स्थानीय तहका कोभिड-१९ अस्थायी अस्पतालमा कार्यरत चिकित्सक तथा अन्य स्वास्थ्यकर्मीले साउन १ गतेदेखि पारिश्रमिक नपाउने भएका छन्।

स्वास्थ्य तथा जनसंख्या मन्त्रालयमा सचिव देवकुमारी गुरागाई र सचिव डा. रोशन पोख्रेलको उपस्थितिमा बिहीबार मन्त्रालयमा भएको बैठकले साउन १ गतेबाट ६४९ स्थानीय तहमा रहेका स्वास्थ्यकर्मीलाई साउन १ गतेदेखि तलब नदिने निर्णय गरेको हो।

तर काठमाडौं उपत्यकामा कोरोनाको उपचार गर्न तोकिएका शुक्रराज ट्रपिकल तथा सरुवा रोग अस्पताल र वीर अस्पतालमा हाल कार्यरत करारका स्वास्थ्यकर्मीको सेवा अवधि पुस मसान्तसम्म थप्ने निर्णय भने मन्त्रालयले गरेको छ।

कोभिड-१९ मोडरेट र गम्भीर बिरामीको उपचारका लागि सातै प्रदेशमा अस्पताल पनि तोकेको छ। अस्पताललाई ‘केस’ बेसका आधारमा उपचार खर्च उपलब्ध गराउने जानकारी मन्त्रालयले दिएको छ।