पेपर मिलमा भुसा ओसार्ने बेल्टमा परेर मजदुरको मृत्यु

जनकपुरधाम : धनुषाको क्षिरेश्वरनाथ नगरपालिका महेन्द्रनगर स्थित एभरेष्ट पेपर मिलमा एक मजदुरको मृत्यु भएको छ।

पेपर मिलमा काम गर्दै गर्दा भुसा ओसार्ने वेल्टमा परी एक मजदुरको मृत्यु भएको हो।

क्षिरेश्वरनाथ नगरपालिका ९ औरहा घर भई हाल वडा नम्बर ५ सिन्धुलीटोल बस्ने ३७ वर्षीय मनोज श्रेष्ठको मृत्यु भएको धनुषा प्रहरीले जानकारी दिएको छ।

शनिबार भुसा ओसार्ने क्रममा श्रेष्ठ वेल्टमा फसेको र मृत्यु भएको एक मजदुरले बताए।

घटना स्थलमा पुगेका इलाका प्रहरी कार्यालय महेन्द्रनगरका टोली मुचुलका उठाएर शव पोष्टमार्टमका लागि पठाएको र घटना विषयमा थप अनुसन्धान भइरहेको प्रहरी निरीक्षक बेचन यादवले बताए।