नेहा चौधरी र निहारिका राजपुत प्रहरी नियन्त्रणमा

काठमाडौं : दाइजोको निहुँमा घरबाट निकालिएकी नेहा चौधरी र कुमारी आमा निहारिका राजपुतलाई प्रहरीले नियन्त्रणमा लिएको छ। आज महोत्तरीको रामगोपालपुरमा सडक आन्दोलन गर्दै सवारीसाधन तोडफोड गरेपछि उनीहरुलाई नियन्त्रणमा लिइएको महोत्तरीका प्रहरी प्रमुख कृष्ण पैयनीले जानकारी दिए।

नेहाले सासु र ससुरालाई पनि पक्राउ गर्नुपर्ने माग राखेर आज दिउँसो सडक आन्दोलन गरेकी थिइन्। नेहाको आन्दोलनमा कुमारी आमा निहारिका राजपुतसहित विद्यार्थी र केही युवाको सहयोगमा सडकमा टायर बालेर आन्दोलनमा साथ दिएका थिए।

सडकमै प्रदर्शन भएपछि आज दिउँसो रामगोपालपुरको सवारीसमेत ठप्प भएको थियो। गत फागुनमा रामगोपालपुरका पंकज चौधरीसँग विवाह गरेकी नेहाले घरेलु हिंसा र दाइजोसम्बन्धी मुद्दा दर्ता गरेपछि प्रहरीले डाक्टरसमेत रहेका पंकजलाई नियन्त्रणमा लिइसकेको छ।