एमालेलाई माओवादीको प्रश्न- रास्वपासँगै सत्तामा हुँदा उपसभामुखको विषयले शिर निहुरिएन ?

काठमाडौँ : प्रमुख प्रतिपक्षी दल माओवादी केन्द्रले राष्ट्रिय स्वतन्त्र पार्टी (रास्वपा) सँगै सत्तामा हुँदा चाहिँ उपसभामुखको विषयले शिर निहुरिएन भन्दै एमालेलाई प्रश्न गरेकाे छ।

मंगलवारको संसदमा सत्तारुढ एमाले सांसद पदम गिरीले उपभामुखको कदमले शिर निहुरिएको भन्दै राजीनामा दिन भनेपछि माओवादी सांसद पूर्णबहादुर घर्तीले जवाफ फर्काएका हुन्।

‘सत्ता पक्षका सांसदले उपसभामुखका कारण हाम्रो शिर निहुरियो भन्नुभयो। उपसभामुख निर्वाचित भएको एक महिनापछि चिठ्ठी लेखिँदै गर्दा एमाले सँगै सत्तामा थियो। कांग्रेस पनि सत्तामै थियो’, उनले भने, ‘त्यसबेला चाहिँ शिर निहुरिएन? अनि आज दुवै ठूला दल मिलेर सत्तामा पुगेपछि शक्तिशाली दम्भ प्रदर्शन गर्दा शिर निहुरियो? बहुमतको दम्भ देखाएर घुमाएर कहीँ कतै रेट्न खोज्दै हुनुहुन्छ?’