महिला क्रिकेटमा नेपालको लगातार चौथो हार !

काठमाडौँ : नेपाल महिला टी-२० अन्तरराष्ट्रिय त्रिकोणात्मक सिरिजअन्तर्गत थाइल्याण्डसँग ५ रनले पराजित भएको छ।

मंगलवार टस जितेर पहिले ब्याटिङ गरेको थाइल्याण्डले ६ विकेटको क्षतिमा जम्मा १०६ रन बनाएको थियो। नेपालका लागि मनिषा उपाध्यायले ३ विकेट लिइन्। रचना चौधरीले १ विकेट लिँदा पूजा महतोले पनि १ विकेट लिइन्।

१०७ रनको लक्ष्य लिएर मैदानमा उत्रिएको नेपालले ८ विकेट गुमाएर जम्मा १०१ रनमात्र बनाउन सक्यो। महिला टी-२० अन्तरराष्ट्रिय सिरिजमा घरेलु टिम नेपाल लगातार चौथो खेलमा पराजित भएको हो।

नेपाल, नेदरल्यान्ड्स र थाइल्याण्डबीच कीर्तिपुरस्थित त्रिवि मैदानमा जारी सिरिजमा नेपालले लगातार चौथो खेल गुमाएको हो। थाइल्याण्ड भने यसअघि खेलेका तीनवटै खेलमा अपराजित थियो। पहिलो र तेस्रो खेलमा नेदरल्याण्ड्सलाई हराएको थाइल्याण्डले दोस्रो खेलमा नेपाललाई पराजित गरेको थियो।