१५ असारभित्रै शिक्षा विधेयक पास गर्ने तयारीमा शिक्षा समिति

काठमाडौं : प्रतिनिधिसभाको शिक्षा, स्वास्थ्य तथा सूचना प्रविधि समितिले ‘विद्यालय शिक्षासम्बन्धी कानुन संशोधन र एकीकरण गर्न बनेको विधेयक २०८०’ यही १५ असार भित्रै पास गर्ने तयारी गरेको छ। समितिले दलहरू शिक्षा विधेयकमा सहमति नजिक पुगेको जनाएको छ।

समितिका अनुसार सबै सहमति जुटेको खण्डमा असार १५ सम्ममा शिक्षा विधेयक समितिबाट पास हुने छ। समितिकी सदस्य ईश्वरी घर्तीले आज बस्ने समितिकाे बैठकले यसबारे टुंगो लगाउने जानकारी दिइन्।

‘कति गते विधेयक पास गर्ने भन्नेमा आज बस्ने समिति बैठकमा थाहा हुन्छ,’उनले भनिन्। शिक्षा समितिको बैठक आज(बिहिबार) दिउँसो २ बजे बस्ने कार्यसूची छ।

सरकार र नेपाल शिक्षक महासंघबीच वैशाख १७ गते असार १५ गतेभित्र शिक्षा विधेयक जारी गर्नुपर्ने सहित ९ बुँदे सहमति भएपछि शिक्षकहरू २९ दिनसम्म चलेको आन्दोलन छाडेर घर फर्किएका थिए। त्यसैले पनि असार १५ भित्र जारी गर्नुपर्ने दबाब सरकार र समितिलाई छ। थाहा खबर