दाङमा बस दुर्घटना‚ २९ जना घाइते

दाङ : लमही नगरपालिका–३ नारायणपुमा यात्रुबाहक बस दुर्घटना हुँदा २९ जना घाइते भएका छन्। वडा प्रहरी कार्यालय लमहीका अनुसार सुर्खेतबाट काठमाडौं जाँदै गरेको कर्णाली प्रदेश ००–००१ ख ०२१९ नम्बरको बस दुर्घटना हुँदा २९ जना यात्रु घाइते भएका हुन्। उनीहरुको अवस्था मध्यम रहेको छ।

शनिबार राति २ बजेतिर बसको पट्टा भाँच्चिएर दुर्घटनामा परेको प्रहरीले जनाएको छ। घाइतेहरूको लमही अस्पतालमा उपचार भइरहेको छ भने सातजना घाइतेको थप उपचारका लागि कोहलपुर सिफारिस गरिएको प्रहरीले जनाएको छ।

घाइतेहरूको नाम ठेगाना भने खुल्न बाँकी रहेको छ। बस चालक प्रहरीको नियन्त्रणमा रहेका छन्।