आईपीएल : दिल्लीमाथि लखनऊको जित

काठमाडौं : इन्डियन प्रिमियर लिग (आईपीएल) क्रिकेटमा नवप्रवेशी लखनऊ सुपर जायन्ट्सले दिल्ली क्यापिटल्समाथि ६ विकेटको जित निकालेको छ। जितसँगै लखनऊ अंक तालिकामा दोस्रो स्थानमा उक्लिएको छ।

१ सय ५० रनको विजयी लक्ष्य पछ्याएको लखनऊले १९.४ ओभरमा ४ विकेट गुमाउँदै पूरा गर्यो। लखनऊको जितमा क्विन्टन डि ककले ८० रन बनाए। ओपनर तथा कप्तान लोकेश राहुलले २४ रन बनाए।

दिल्लीका कुलदीप यादवले २ विकेट लिए। त्यसैगरी, शार्दुल ठाकुर र ललित यादवले १–१ विकेट लिए।

त्यसअघि डिवाई पाटिल स्पोर्ट्स एकेडेमी मुम्बईमा टस हारेर पहिला ब्याटिङको निम्तो पाएको दिल्लीले निर्धारित २० ओभरमा ३ विकेट गुमाउँदै १ सय ४९ रन बनाएको थियो। दिल्लीका ओपनर पृथ्वी शाले ६१ रनको योगदान बनाए भने कप्तान ऋषभ पन्त ३९ रनमा अविजित रहँदा शरफराज खानले ३६ रन बनाए।

लखनऊका रवि विश्रोईले २ विकेट लिए भने स्पिनर कृष्णाप्पा गोथमले १ विकेट लिए।