पिएल सिंहले नेपालको प्रजातान्त्रिक आन्दोलनमा धेरै योगदान दिनुभयो : देउवा

काठमाडौं : नेपाली कांग्रेसका सभापति शेरबहादुर देउवाले काठमाडौं महानगरपालिकाका पूर्वमेयर पिएल सिंहले नेपालको प्रजातान्त्रिक आन्दोलनमा ठूलो योगदान दिएको बताएका छन्। सिंहको पार्थिव शरीर कांग्रेस केन्द्रीय कार्यालय सानेपामा राखेर गरिएको श्रद्धाञ्जली सभामा उनले यस्तो बताएका हुन्।

उनले सिंह अत्यन्तै मिलनसार र सहयोगी रहेको पनि बताए। यतिखेर उनको पार्थिव शरीर नेपाली कांग्रेसको पार्टी कार्यालय सानेपामा राखिएको छ। ८५ वर्षीय सिंह लामो समयदेखि आन्द्राको समस्याबाट पीडित थिए।

उनी ०४६ सालसम्म चाक्सीबारीस्थित गणेशमान सिंहको निवासमै बसेका थिए। गणेशमान र मंगलादेवी सिंहलाई सहयोग गरेका थिए। पीएल त्यसपछि आफ्नै निवासमा बस्न थालेका थिए।

२०४९ मा स्थानीय निर्वाचन जितेर तत्कालीन काठमाडौं नगरपालिकाका मेयर बने। पञ्चायत व्यवस्थापछि काठमाडौंका उनी पहिलो मेयर हुन्।