शिवराज साझेदारी वन उपभोक्ता समूहको आठौँ साधारणसभा

१६ भदौ ।

कपिलवस्तुको शिवराज साझेदारी वन उपभोक्ता समूहको आठौँ साधारणसभा सम्पन्न भएको छ। समूहका अध्यक्ष हरि पोखरेलको अध्यक्षतामा सम्पन्न साधारणसभामा लुम्बिनी प्रदेशसभा सदस्य अर्जुनकुमार केसी प्रमुख अतिथिका रूपमा सहभागी भएका थिए ।

कार्यक्रमलाई सम्बोधन गर्दै प्रमुख अतिथि केसीले वन संरक्षणसँगै वनबाट प्राप्त हुने लाभ समुदायको हितमा उपयोग हुनुपर्ने बताए । उहाँले वन स्रोतको दिगो व्यवस्थापन गर्दै उपभोक्ताको हितलाई प्राथमिकतामा राखेर काम गर्नुपर्नेमा जोड दिए ।

कार्यक्रममा डिभिजन वन कार्यालय गौतमबुद्धका प्रमुख गणेशबहादुर खड्काले वन संरक्षण तथा व्यवस्थापनका विषयमा धारणा राख्नुभएका थिए ।

शिवराज नगरपालिका-५ का वडा अध्यक्ष नेत्र बेल्वासेले उपभोक्ताको आवश्यकतालाई आधार बनाएर काठ वितरण गर्नुपर्ने बताए । वनबाट प्राप्त काठ वास्तविक आवश्यकता भएका उपभोक्ताले सहज रूपमा पाउने व्यवस्था गर्नुपर्ने उनको भनाइ थियो ।

सभामा समूहका अध्यक्ष हरि पोखरेलले वार्षिक प्रतिवेदन तथा आर्थिक प्रतिवेदन प्रस्तुत गर्नुभएको थियो। प्रतिवेदनमा चालु वर्ष ८ सय ४६ वटा रुख कटान गर्ने उल्लेख गरिएको छ।

साधारणसभाले प्रधानमन्त्री राहत कोषमा ५० हजार रुपैयाँ जम्मा गर्ने निर्णय समेत गरेको अध्यक्ष पोखरेलले जानकारी दिए ।

साधारणसभामा वन संरक्षण, व्यवस्थापन, काठ वितरण तथा उपभोक्ताको हितलगायतका विषयमा छलफल भएको थियो । कार्यक्रममा समूहका पदाधिकारी, सदस्य तथा उपभोक्ताहरूको सहभागिता रहेको थियो।