कपिलवस्तुमा मोटरसाइकलको ठक्करबाट एक पैदलयात्रीको मृत्यु

कपिलवस्तु, कात्तिक १८ गते । कपिलवस्तुको शिवराज नगरपालिका–५ चन्द्रौटा खसीबजारमा मोटरसाइकलको ठक्करबाट एक जना पैदलयात्रीको मृत्यु भएको छ ।

पूर्व–पश्चिम राजमार्गअन्तर्गत पूर्वबाट पश्चिमतर्फ जाँदै गरेको रा ७ प २४४६ नम्बरको मोटरसाइकलले पैदल हिँडिरहेकी स्थानीय ७० वर्षीया टीका पौडेललाई बिहान ६:१० बजेतिर ठक्कर दिएको थियो ।

मोटरसाइकलको ठक्करबाट टाउकोमा गम्भीर चोट लागेकी पौडेललाई तत्काल सञ्जीवनी सामुदायिक अस्पताल चन्द्रौटामा उपचारका लागि लगिएको थियो ।

त्यहाँबाट थप उपचारका लागि बुटवल रिफर गरिएकी पौडेलको बुटवलस्थित चौराहा अस्पतालमा उपचारका क्रममा बिहान ७:४५ बजेतिर मृत्यु भएको जिल्ला ट्राफिक प्रहरी कार्यालय कपिलवस्तुका प्रहरी निरीक्षक राजन ढकालले बताउनुभयो ।

दुर्घटनामा संलग्न मोटरसाइकल चालक सल्यानको कपुरकोट गाउँपालिका–३ निवासी २२ वर्षीय भुपबहादुर बुढाथोकीलाई प्रहरीले नियन्त्रणमा लिएको छ ।