यशोधरामा ५० बर्ष माथीका १५ जना कुष्ट रोगी

शम्भू माली
कपिलबस्तु माघ १३

नियमितरुपमा औषधि खाए पूर्णरुपमा निको हुने भए पनि कुष्ठरोगी अझै खुलेर बाहिर आउन सकेका छैनन् । समाजबाट अपहेलित हुने डरले कुष्ठरोगका बिरामी निर्धक्कसँग बाहिर आउन नसकेका हुन् । पूर्वाग्राही शक्ति, कुशासन र विभेद्का कारण रोगी घृणित हुने गरेकाले कुष्ठरोगीलाई समाजमा खुल्ला वातावरण सिर्जना गर्नु अहिलेको मुख्य चुनौति रहेको यशोधरा गाँउपालिकाका स्वास्थ्य संयोजक ज्योति प्रकाश दुबेले बताए । “कुष्ठरोगीलाई समाजले हेर्ने दृष्टिकोण राम्रो छैन, जान्ने बुझ्ने मान्छेबाटै कुष्ठरोगी अपहेलित भइरहेका छन” उनले भने, “यसप्रति सकारात्मक सचेतना फैलाउन आवश्यक छ ।”
कुष्ठरोगका बिरामीले आफ्नै घर नजिकको स्वास्थ्य संस्थामा पुगेर औषधि नखाई अन्यत्रैको स्वास्थ्य संस्थामा गएर औषधि सेवन गर्ने प्रचलन कायम रहेको उनले बताए । “नजिकको अस्पतालमा गएर औषधि सेवन गर्दा अरुले चिन्लान् भन्ने भय व्याप्त छ”, उनले भने, “त्यस्तो भयलाई हटाउन स्वास्थ्य कार्यालयले पनि कुष्ठरोगका बिरामीलाई सचेतना दिने गरेको छ ।”
छ महिना र एक वर्षसम्म नियमित औषधि खाएपछि निको हुने भएकाले कुष्ठरोगीलाई ठूलो रोगका रुपमा लिन नहुने संयोजक दुबेले बताए । “खुलेर आउन नसक्ने त्यस्ता बिरामीलाई अस्पताल सम्म पुुुर्यउने वातावरण सिर्जना गर्नुपर्छ,” गाँउपालिका उपाध्यक्ष कन्याती उपाध्यायले बताईन । उनका अनुसार कुष्ठरोगप्रतिको भ्रम र डरलाई हटाउन परिवार तथा समुदायमा रोगका बारेमा सही जानकारी दिने र प्रचारप्रसार अभियान सञ्चालन गरिएको छ । यशोधरा गाँउपालिकामा ५० बर्ष माथीका १५ जना कुष्ट रोगी रहेका संयोजक दुबे बताए ।