संसद्लाई प्रभावकारी बनाउन सत्तापक्ष गम्भीर छ : महेश बर्तौला

काठमाडौँ : नेकपा एमालेका प्रमुख सचेतक महेश बर्तौलाले संसद्लाई प्रभावकारी बनाउन सत्तापक्ष गम्भीर रहेको बताएका छन्।

मंगलवार सिंहदरबारमा बसेको कार्यव्यवस्था परामर्श समितिको बैठकपछि सञ्चारकर्मीहरूसँगको कुराकानीमा उनले यस्तो बताएका हुन्। उनले बैठकले संसद् सञ्चालनको मिति हेरफेर गरेको बताए। उनले अहिलेको सरकारले संसद्लाई बिजनेस दिने र संसद्‌बाट कानून बनाउने कुरामा तीव्रता दिने बताए।

संसद्लाई प्रभावकारी बनाउने कुरामा सत्तापक्ष अलि बढी जिम्मेवार हुनुपर्ने कुरा प्रतिपक्षले राखेको र त्यो स्वभाविक रहेको उनको कथन थियो।

बर्तौलाले भने‚ ‘संसद्को बैठकका मिति हेरफेर गरिएका छन्। कार्यसूची त लगभग त्यही नै भयो। २४ गते अध्यादेशहरू संसद्‌मा पेश हुनेछन्। २५ पनि बैठक हुनेछ। २७,२८,२९ गते बैठक हुनेछ। संसद्लाई प्रभावकारी बनाउने कुरामा सत्तापक्ष अलि बढी जिम्मेवार हुनुपर्छ। संसद र संसदीय समितिमा सत्ता पक्ष महत्त्वपूर्ण हुन्छ‚ बढी जवाफदेही भूमिका निर्वाह गर्नुपर्छ।’

प्रमुख सचेतक बर्तौलाले संसद् र संसदीय समितिमा कोरममा सत्तापक्षले विशेष ध्यान दिनुपर्ने बताए।