‘चुनावपछि ओली प्रधानमन्त्री, अहिलेको सरकार कमण्डलु लिएर बनारसतिर जान्छ’

काठमाडाैं : प्रतिनिधिसभा सदस्य मायादेवी न्यौपानेले सरकारले जनताको मागअनुरुप केही दिन नसकेकाले सरकारको नाम छैनबहादुर, दिन्नँबहादुर र सक्दिनँबहादुर राख्नुपर्ने टिप्पणी गरिन्।

प्रतिनिधिसभाकाे बैठकमा बाेल्दै सरकार मंसिर ४ गते हुने निर्वाचनपछि कमण्डलु लिएर बनारस जानुपर्ने बताइन्।

‘यो सरकारले जनतालाई केही पनि दिन सक्दैन। विद्यार्थीलाई किताब दिन सक्दैन। किसानलाई मल, बीउ र सिँचाइ दिन सक्दैन। व्यवसायीलाई कच्चा पदार्थ दिन सक्दैन।

उद्योगीलाई सञ्चालन गर्न अवरोध गर्छ‘ उनले भनिन्, ‘यो केही पनि दिन नसक्ने सरकारको नाम छैनबहादुर, दिन्नँबहादुर र सक्दिनँबहादुर राखौँ कि कसो? यो सरकार खरानी घसेर मंसिर ४ गने हुने निर्वाचनमा कमण्डलु लिएर बनारसतिर जाओस्‚ दिल्लीतिर जाओस्। एमालेका केपी शर्मा ओली पुनः प्रधानमन्त्री हुनुहुनेछ।’

निर्वाचनपछि नेकपा (एमाले)का अध्यक्ष ओली प्रधानमन्त्री हुने दाबी उनले गरिन्।