अन्तर्राष्ट्रिय श्रमिक दिवसमा राष्ट्रपतिको शुभकामना

१८ बैशाख, काठमाडौं : राष्ट्रपति रामचन्द्र पौडेलले अन्तर्राष्ट्रिय श्रमिक दिवसले हक, हित, अधिकार तथा स्वतन्त्रताको रक्षाका लागि विश्वभरका श्रमजीवीलाई एकताको सूत्रमा बाँध्न सहयोग पुग्ने विश्वास व्यक्त गरेका छन्।

विश्व मजदुर दिवस (मे१)को अवसरमा स्वदेश तथा विदेशमा रहेका नेपाली श्रमजीवीलाई शुभकामना दिँदै उनले मुलकमा लोकतन्त्रात्मक, समाजवादोन्मुख अर्थतन्त्र निर्माण गर्न संवैधानिक प्रावधानले मूर्तरूप लिदै जाने सन्दर्भमा श्रमिक वर्ग पनि लाभान्वित हुने विश्वास लिएको बताएका छन्।

‘मुलुकको आर्थिक समृद्धिका लागि उद्यमशीलताको विकासमार्फत् स्वदेशी उत्पादन वृद्धिगरी स्वावलम्बी र आत्मनिर्भर अर्थतन्त्र निर्माण गर्न अत्यावश्यक छ’, राष्ट्रपतिको सन्देशमा भनिएको छ, ‘उद्यमशीलताको विकास गर्न पूँजी लगानी गर्ने उद्यमी र श्रम तथा सीप लगानी गर्ने श्रमिकहरू दुवैको योगदान उत्तिकै महत्त्वपूर्ण हुने भएकोले मर्यादित श्रमको वातावरण निर्माण गरी उत्पादन र उत्पादकत्व वृद्धि गर्नुपर्दछ भन्ने लाग्दछ।’

राष्ट्रपति पौडेलले विश्व मजदुर दिवसले श्रमको सम्मान, स्वरोजगार, उचित पारिश्रमिक एवं सामाजिक सुरक्षा लगायतका श्रमिक अधिकारलाई सुनिश्चित गर्नेतर्फ अग्रसर हुन सबैलाई प्रेरणा प्रदान गरोस् भन्ने कामना गरेका छन्।