धुलिखेलमा १० क्विन्टल चिनी बरामद

१७ कार्तिक, काभ्रेपलाञ्चोक : काभ्रेपलाञ्चोकको धुलिखेलमा प्रहरीले १० क्विन्टल चिनी बरामद गरेको छ।

नेपाल प्रहरी र ट्राफिक प्रहरीको संयुक्त टोलीले विपी राजमार्गअन्तर्गत काभ्रेपलाञ्चोकको धुलिखेल नगरपालिका–९ स्थित काभ्रेभञ्ज्याङबाट बिहीबार सवारीसाधन जाँचका क्रममा ३३ बोरामा लुकाएर ल्याएको १० क्विन्टल चिनी बरामद गरेको छ।

जिल्ला प्रहरी कार्यालयका सूचना अधिकारी प्रहरी नायब उपरीक्षक राजकुमार श्रेष्ठका अनुसार बीपी राजमार्ग भएर अवैधरूपमा चिनी भित्रिने गरेको छ। प्रहरीले यो राजमार्गमा अहिले नियमितरूपमा यातायातका साधन जाँच गरिरहेको उनले बताए।

प्रहरीले यसअघि यही कात्तिक पहिलो साता सोही राजमार्गबाट राजस्व छली गरेर ल्याएको ९२ बोरा चिनी ट्रकबाट बरामद गरेको थियो। ट्रकमा धानको बोराले छोपी ल्याएको ९२ बोरा चिनी र २८ बोरा धान बरामद गरी ट्रक नियन्त्रणमा लिएको थियो।