मन्त्रालय फुटाएर संख्या बढाउँदैनौँ : कोशी प्रदेशका मुख्यमन्त्री कार्की

विराटनगर : कोशी प्रदेशका मुख्यमन्त्री हिक्मतकुमार कार्कीले कोशी प्रदेशमा मन्त्रालय नबढाउने बताएका छन्।

आज विराटनगर विमानस्थलमा पत्रकारहरुसँग उनले सरकार विस्तार गर्दा मन्त्रालय नबढाउने बताएका हुन्।

नेपाली कांग्रेसका सभापति शेरबहादुर देउवा र प्रधानमन्त्री केपी शर्मा ओलीलाई केही दिनअघि मन्त्रालय नफुटाउने भनेर कुरा गरिसकेको जानकारी दिँदै प्रदेशस्तरमा पनि कांग्रेसका नेताहरुसँगसमेत मन्त्रालय नफुटाउने कुराकानी भएको उनको भनाइ थियो।

‘हामी मन्त्रालय बढाउँदैनौँ, अहिले भएकै मन्त्रालयमा मुख्यमन्त्रीसहित एमालेले ५ र कांग्रेसले ४ मन्त्रालय लिन्छ‚’ उनले भने।

मुख्यमन्त्री कार्कीले १/२ दिनभित्रै मन्त्रिपरिषद विस्तार हुने जानकारी दिए। कांग्रेसले नाम दिने बित्तिकै मन्त्रिपरिषद विस्तार हुने मुख्यमन्त्री कार्कीको भनाइ छ।