देउवासँग एनआरएनए अध्यक्ष केसीको गुनासो

काठमाडौँ : गैरआवासीय नेपाली सङ्घ (एनआरएनए) का अध्यक्ष बद्री केसीले नेपाली कांग्रेसका सभापति एवं पूर्वप्रधानमन्त्री शेरबहादुर देउवालाई भेटेर गुनासो गरेका छन्।

सरकारले विदेशमा बस्ने नेपालीलाई गैरआवासीय नेपाली नागरिकता दिन थाले पनि त्यसको संविधानतः कार्यान्वयन नहुँदा समस्या परेको केसीले गुनासो गरेका थिए।

उक्त समस्या समाधानका लागि केसीले देउवासँग अनुरोध गरेका छन्। ‘संविधानले दिएको अधिकार प्राप्तिका लागि पटक–पटक सरकारको ध्यानाकर्षण गराउँदा पनि पछिल्लो पटक गैरआवासीय नेपालीलाई १० वर्ष भिसा शुल्क नलाग्ने भनेर अध्यादेश आउँदा विदेशमा रहेका नेपालीहरू थप निराश भएको’ एनआरएनएले विज्ञप्तिमार्फत जनाएको छ।

सभापति देउवाले एनआरएनका समस्या समाधानका निम्ति आफ्नो तर्फबाट हरसम्भव प्रयत्न गर्ने प्रतिबद्धता व्यक्त गरेको एनआरएनएको विज्ञप्तिमा उल्लेख छ।