बयान दिन चितवन पुगे रवि लामिछाने

चितवन : सहारा सहकारी ठगी प्रकरणमा मुछिएका राष्ट्रिय स्वतन्त्र पार्टी रास्वपाका सभापति रवि लामिछाने चितवन पुगेका छन्।

मंगलबार चितवन जिल्ला अदालतमा ठगी मुद्दा दर्ता भएपछि रवि बयानका लागि चितवन पुगेका हुन्।

रास्वपा चितवन जिल्ला संयोजक कृष्णप्रसाद भुसालका अनुसार रवि चितवन आएर चौबिसकोठीस्थित होटल ग्लोबलमा बसेका छन्। त्यहाँ उनी कार्यकर्ता भेटघाटमा व्यस्त छन्।

जिल्ला अदालतका सूचना अधिकारी अमृत विश्वकर्माले पनि रवि अदालतमा उपस्थित हुनेबारे औपचारिक पत्र प्राप्त नभइसकेको बताए।

चितवनको साहारा सहकारी ठगी प्रकरणमा रविविरुद्ध मंगलबार चितवन जिल्ला अदालतमा ठगी मुद्दा दायर भएको थियो।

रविको बयान आज सकिएपछि थुनछेक बहस सुरु हुने छ। त्यसपछि न्यायाधीशले उनलाई साधारण तारेखमा छाड्ने, धरौटीमा छाड्ने वा थुनामा पठाउने भन्ने निर्णय गर्नेछन्।