नागढुङ्गा-नौबिसे सडक दैनिक साढे ४ घण्टा बन्द हुने

काठमाडौं : राजधानी भित्रिने मुख्य नाका नागढुङ्गा-नौबिसे सडकखण्ड दैनिक साढे ४ घण्टा बन्द हुने भएको छ।

जेठ १० गतेदेखि २५ गतेसम्म बिहान साढ १० बजेदेखि दिउँसो ३ बजेसम्म सडकखण्ड बन्द गरेर निर्माणको काम गर्न लागिएको काठमाडौंका प्रमुख जिल्ला अधिकारी ऋषिराम तिवारीले जानकारी दिए। यसअघि यो खण्ड राति बन्द गरेर काम हुँदै आएको थियो।

सडक आयोजनाले नागढुङ्गा–पिपलामोड सडक निर्माणका लागि यसरी सडक बन्द गर्नुपर्ने आवश्यकता रहेको बताएको थियो। नारायणगढ-मुग्लिन सडक योजना (पूर्वी खण्ड)ले आज सूचना गरी काठमाडौंबाट जाने सवारीसाधन नागढुङ्गामा र नौबिसेतर्फबाट आउने सवारीसाधन खानीखोलामा रोकिने उल्लेख गरेको छ।

बन्दको समयमा धार्के-सितापाइला तथा टोखा–छहरे त्रिशूली गल्छी सडक प्रयोग गर्न अनुरोध गरिएको छ। थाहा खबर