नेकपामा क्लब बनाएर कचकच नगर्न असन्तुष्ट नेताहरुलाई गोकुल बास्कोटाको सुझाव

काठमाडौं । नेकपाका नेता तथा पूर्व सञ्चार मन्त्री गोकुल बास्कोटाले नेकपा भित्रका असन्तुष्ट नेताहरुलाई क्बल बनाएर आलोचना नगर्न चेतावनी दिनुभएको छ ।

उहाँले नेकपाका नेताहरु पुष्पकमल दाहाल प्रचण्ड, माधव नेपाल, झलनाथ खनाल, बामदेव गौतमलगायतलाई धेरै कचकच गर्दै बस्नुभन्दा अध्यक्ष र प्रधानमन्त्रीबाट केपी शर्मा ओलीलाई निकाल्न चुनौती पनि दिनुभएको छ ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुराकानी गर्र्दै उहाँले तथ्यमा उभिएर खण्डन र विरोध गर्न असन्तुष्ट पक्षका नेताहरुलाई सझुाव दिनुभयो ।

कसैलाई केही हुन मन लाग्यो भनेर नहुने बताउदै उहाँले अहिले नेकपाको धेरै कुरा अन्तरिम भएकाले कसैले बालहठ गर्नुको अर्थ नभएको उहाँको भनाई छ ।

केपी ओलीकै कारणले नेकपा ठूलो पार्टी भएको र जनताले निर्वाचित गरेकाले उहाँले प्रधानमन्त्रीबाट राजीनामा दिनु नपर्ने र महाधिवेशनमा नजादाँसम्म पार्टीमा दुई ओटा पाईलट रहने बैधानिक व्यवस्था नै रहेको बास्कोटाले तर्क गर्नुभयो ।

उहाँले भन्नुभयो, “हटाउन नै खोजेको भने आधिकारीक निकायबाट प्रक्रिया अगाडी बढाए भो नी, अव त अति भो कचकच । नेताहरुको तरिकाले कार्यकर्ता पनि वाक्क दिक्क भइसके । सकिन्छ मिलेर गरौँ सकिदैन भने आ आफ्नो पहिलाको पार्टी छ त्यतै लागौँ । सधैँ गनगन नगरौँ ।”

नेकपामा रहेका सवै शिर्ष नेताहरु लामो समयदेखि नेतृत्वमा रहेकाले कस्को क्षमता कति छ कस्ले देशका लागि कती गर्न सके भन्ने कुरा छर्लङ्ग रहेको बताउदै उहाँले कसैलाई ठूला कुरा नगर्न चेतावनी पनि दिनुभयो ।

सचिवालयको काम संख्या गन्ने मात्रै भएको टिप्पणी गर्दै उहाँले जे गर्नु पर्ने हो त्यो नगरेर गर्नु नपर्ने कुरामा अल्मलीएको बताउनुभयो ।
कुण्ठा मात्रै पोखेर फजुल कुरा गरेर राष्ट्रिय दायित्वलाई ओझेल नपार्न आग्रह गर्दै उहाँले कार्यकर्ताहरुलाई दन्त बझान गराउन र पाखुरा सुर्कन लगाएर समाधान नहुने तर्क गर्नुभयो।

नेता बास्कोटाले अहिले जे जति हल्ला भएपनि अन्त्यमा कुरा मिल्ने र पार्टीमा कुनै भूकम्प नआउने दावी पनि गर्नुभयो । उहाँले सरकारले सवै ठाउँमा काम गरिरहेको बताउदै हरेक निर्वाचन क्षेत्र र गाउँ गाउँमा गएर हेर्न सुझाव दिनुभयो ।