विदेशमा ३९ हजार ५ सय नेपालीमा कोरोना सङ्क्रमण, झण्डै ३६ हजार निको

काठमाण्डौ – कोरोनाका कारण संसारका विभिन्न देशमा कार्यरत ३९ हजार ५ सय २८ नेपाली सङ्क्रमित भएका छन् ।

गैरआवासीय नेपाली संघ एनआरएनएका अनुसार नेपाल बाहेक विभिन्न देशमा रहेका ३९ हजार ५ सय २८ नेपाली सङ्क्रमित भएका छन्, यसमध्ये ९२ प्रतिशत निको भएका छन् ।

नेपाल बाहेक ४२ देशमा ३५ हजार ९ सय १६ जना निको भएको स्वास्थ्य समितिले जनाएको छ । स्वास्थ्य समितिका संयोजक डा. सञ्जीव सापकोटाका अनुसार गएको साता साउथ अफ्रिकामा रहेका १ जना नेपालीको ज्यान गएको छ ।

समितिका अनुसार कोरोना सङ्क्रमणका कारण अहिलेसम्म विदेशमा १८ देशका २ सय ६६ जना नेपालीको ज्यान गएको छ ।

गएको साता स्पेन, भारत, कतार, कुवेत, साउदी अरबमा रहेका नेपालीहरुमा नयाँ कोरोना भाइरसको सङ्क्रमण देखिएको छ ।