कलंकीमा रोकिराखेको ट्रकमा अर्को ट्रक ठोक्किँदा तीन जनाको ज्यान गयो

काठमाण्डौ – काठमाण्डौको कलंकीमा बिहान भएको दुर्घटनामा तीन जनाको ज्यान गएको छ ।

मकालु पेट्रोल पम्प छेउमा पार्किङ गरेर राखेको बा ३ ख ७५ ३० नम्बरको ट्रकलाई कुखुराको चल्ला लिएर आएको बा ५ ख ८८६५ नम्बरको ट्रकले ठक्कर दिँदा ठक्कर दिने ट्रकमा रहेका ३ जनाको ज्यान गएको महानगरीय प्रहरी वृत्त कालिमाटीका प्रमुख डीएसपी अपिलराज बोहोराले जाकारी दिनुभयो ।

दुर्घटनामा नुवाकोट सुन्दरदेवी गाउँपालिकाका २४ वर्षका रोशन तामाङ, नुवाकोट तारकेश्वरका ३७ वर्षका माधव घिमिरे र नुवाकोट तारकेश्वरकै भुवेन्द्र तामाङको ज्यान गएको प्रहरीले जनाएको छ । दुर्घटनामा घाइते नुवाकोट तारकेश्वर घर भएका २२ वर्षका विजय तामाङको उपचार भइरहेको छ ।

ट्रक तीव्र गतिका कारण दुर्घटना भएको हुन सक्ने प्रहरीको अनुमान छ । दुईवटै ट्रकलाई प्रहरीले नियन्त्रणमा लिएको छ ।