नीति तथा कार्यक्रम पारित गर्न प्रदेश २ मा जसपाको ह्वीप

जनकपुरधाम । प्रदेश २ सरकारले प्रस्तुत गरेको नीति तथा कार्यक्रम पारित गर्न सत्तारुढ जनता समाजवादी पार्टी (जसपा)ले ह्वीप लगाएको छ ।

प्रदेशसभामा जेठ २७ गते प्रस्तुत भएको नीति तथा कार्यक्रममाथि शनिबारदेखि छलफल प्रारम्भ भएको छ । आइतबार थप छलफल गरी पारित गर्ने कार्यक्रम रहेको छ ।

जसपा संसदीय दलका नेता समेत रहेका मुख्यमन्त्री लालबाबु राउतले संसदीय दलको बैठकमा सचेतकलाई ह्वीप लगाउन निर्देशन दिएको आधारमा ह्वीप लगाइएको सांसद रामाशिष यादवले जानकारी दिए । उनले भने, ‘ह्वीप त सबै सांसदले मान्नैपर्‍यो ।’

पार्टीभित्रको पूर्व राजपा समूह संघीय सरकारमा गएपछि पूर्व समाजवादी समूहले प्रदेश सरकारबाट पूर्व राजपाका मन्त्रीलाई हटाएर कांग्रेसलाई सरकारमा ल्याएको छ । पूर्व राजपा समूहले नीति तथा कार्यक्रम पारित गर्न नसक्ने आशंकामा ह्वीप लगाइएको पार्टीका एक सांसदले जनाए ।

यद्यपि नीति तथा कार्यक्रमलाई के गर्ने ? भन्ने सन्दर्भमा आफूहरुको कुनै छलफल नै नभएको पूर्व राजपाका सांसद उपेन्द्र महतोले बताए । पूर्व राजपा पनि नीति तथा कार्यक्रम पारित गर्ने पक्षमा देखिएको एक सांसदले बताए ।