गोकर्ण विष्टको टिप्पणी : दल बिभाजन सम्बन्धी अध्यादेश ल्याउने सरकारको निर्णय अत्यन्तै खेदजनक

काठमाडौं, १ भदौ । नेकपा (एमाले) का नेता गोकर्ण विष्टले सरकारले दल विभाजनसम्बन्धी अध्यादेश ल्याउने गरेको निर्णय खेदजनक भएको बताएका छन् । सरकारले अध्यादेश ल्याउने निर्णय गरेलगत्तै नेता तथा सांसद विष्टले यस्तो प्रतिक्रिया दिएका हुन् । सामाजिक सञ्जालमार्फत उनले दलभित्र उत्पन्न हुने अन्तरविरोध र समस्यालाई दलभित्रै विधिसम्मत् ढंगले समाधान खोज्नुको साटो विभाजनलाई प्रोत्साहन गर्ने काम गर्न नहुने उनको भनाई छ ।

उनले लेखेका छन्-“लोकतान्त्रिक अभ्यास र संविधानको मर्म विपरित दल बिभाजन सम्बन्धी अध्यादेश ल्याउने सरकारको निर्णय अत्यन्तै खेदजनक छ । यसले दलभित्र उत्पन्न हुने अन्तरबिरोध र समस्यालाई दलभित्रै विधिसम्मत ढङ्गले समाधान खोज्नुको सट्टा बिभाजनलाई प्रोत्साहित गर्नेछ । राजनीतिक अस्थिरता, अन्यौलता र अराजकता सृजना गर्नेछ । दलहरुप्रति विकर्षण र वितृष्णा पैदा गर्नेछ । अन्ततः यसले नेपालको राजनीतिमा दु:खद परिणाम निम्त्याउने छ । यसप्रकारको प्रतिगामी निर्णयको सबैले बिरोध गरौँ । फिर्ता लिन बाध्य पारौँ ।”