नेपाल प्रहरीका ८ एसपी एसएसपी बढुवाका लागि सिफारिस

काठमाडौं : गृह मन्त्रालयले नेपाल प्रहरीका आठजना एसपीलाई एसएसपीमा बढुवाका लागि सिफारिस गरेको छ। सोमबार मन्त्रालयमा बसेको बढुवा समितिको बैठकले यसअघिको बढुवामा छुटेका उनीहरुलाई बढुवाका लागि सिफारिस गरेको हो।

प्रहरी नियमावली अनुसार बढुवा सिफारिस भएका एसपीविरुद्ध कुनै उजुरी नपरे उनीहरु स्वतः बढुवा हुनेछन्।

गृहमन्त्रालयले सुन तस्करी प्रकरणमा मुछिएर मुद्दा खेपेका तर केही समयअघि सफाई पाएका एसपी विकासराज खनालसहित आठजनालाई बढुवा सिफारिस गरेको हो। एसपी खनाल पहिलो नम्बरमा सिफारिस भएका छन्।

बढुवा सिफारिस हुनेहरुमा सुदिपराज भण्डारी, अनुरागकुमार द्विवेदी , राजेन्द्रसिंह खड्का, योगबहादुर पाल, टिकाबहादुर केसी, ध्रुबराज राउत र भोलाबहादुर रावल रहेका छन्।