कांग्रेस लुम्बिनी प्रदेश समिती सदस्यमा शुशिला बेल्बासेको उम्मेदवारी

बिकाश भुसाल, कपिलवस्तु । नेपाली कांग्रेस लुम्बिनी प्रदेश समितिको प्रदेश सदस्य पदमा कपिलवस्तुकि युवा संचारकर्मी तथा कांग्रेस नेतृ शुशिला बेल्बासेले उम्मेदवारी दिने घोषणा गर्नुभएको छ ।

नेपाली कांग्रेसको आसन्न १४ औँ महाधिवेशनमा महाधिवेशन केन्द्रिय प्रतिनिधिमा सर्वाधिक मत ल्याइ बिजय बन्नुभएकी बेल्बासेले लुम्बिनी प्रदेश समिति सदस्यमा पनि उम्मेदवारी दिने घोषणा गर्नु भएको हो । बिपिको समाजवादको सपना साकार पार्न युवा पुस्ता राजनीतिमा आउनु पर्ने र युवा पुस्ताले राजनीतिमा अवसर पाउनु पर्छ भन्ने मान्यता राख्ने बेल्बासे कपिलबस्तुकै कान्छी केन्द्रिय महाधिवेशन प्रतिनिधि पनि हुनुहुन्छ ।

सानै उमेर देखि संचार क्षेत्रमा भुमिका निर्वाह गर्दै आउनु भएकी शुशिला बेल्बासेले २०७० सालमा नेबि संघको केन्द्रिय सदस्यको जिम्मेवारी पनि सम्हाल्नु भएको थियो । नेपाली कांग्रेसको भातृ संगठन (नेपाल विद्यार्थी संघ) को राजनीति गर्दै नेपाली कांग्रेस काठमाडौ-कपिलवस्तु सम्पर्क मंचको सचिबको भुमिका निर्वाह गर्नुभएकि बेल्बासे कपिलवस्तुको दक्षिणी-पश्चिमी क्षेत्रमा उदाउँदो युवा राजनीतिज्ञ पनि हुनुहुन्छ ।

२८ बर्षमा कांग्रेसको केन्द्रिय महाधिवेशन प्रतिनिधिमा बहुमत प्राप्त गरि युवा पुस्तालाइ हौसला दिने शुशिला बेल्बासेले कांग्रेसको संस्थापन र इतर पक्षमा नलागी आफू साझा उम्मेदवार रहेको बताउनु भयो ।