वडाको निर्णय : दाहसंस्कार गर्न दाउरा,गर्भवतीलाई निशुल्क एम्बुलेन्स

माधव बेल्वासे चन्द्रौटा । शिवराज नगरपालिका वडा न ३ ले दाहसंस्कार गर्न निशुल्क दाउरा प्रदान गर्ने निर्णय गरेको छ । २०७९/८० को वडा स्तरीय योजना अनुसार वडा वासीको मृत्यु भएमा दाहसंस्कारको लागि ६ क्युन्टल दाउरा उपलब्ध गराउने वडा अध्यक्ष टेकलाल सापकोटाले बताउनुभयो ।

दाहसंस्कारको लागि दाउराको कारणले मृतकका परिवार लाई समस्या नहोस भनेर वडाको योजनामा समावेश गरेको उहाले बताउनुभयो । डिभिजन वन तथा कपिलवस्तु साझेदारी वन सग सहकार्य दाउरा उपलब्ध गराउने भएकोले कसैको मृत्यु भएमा वडामा सम्पर्क गर्न अध्यक्ष सापकोटाले आग्रह गर्नुभयो ।

त्यस्तै वडाले एम्बुलेन्स पनि संचालनमा ल्याएको छ ।वडाको स्वास्थ्य चौकी बाट गर्भवती महिला र सुत्केरी महिलाहरु रिफर भएमा निशुल्क एम्बुलेन्स सेवा प्रदान गरिने उहाले बताउनुभयो । अन्य बिरामी हरु लाई न्युनतम शुल्क लाग्ने बताइएको छ ।