कांग्रेस जिल्ला सभापतिहरुको आरोपः सीमा अतिक्रमण जस्तो विषयमा सरकार गम्भीर भएन

काठमाडौं । प्रमुख प्रतिपक्षी दल नेपाली काँग्रेसका जिल्ला सभापतिहरुले सीमा अतिक्रमणका विषयमा सरकार गम्भीर नभएको आरोप लगाएका छन्। सभापतिहरुले सीमा अतिक्रमण जस्तो गम्भीर विषयमा थाहै नपाएको भन्ने प्रधानमन्त्रीको अभिव्यक्ति लज्जास्पद रहेको टिप्पणी पनि गरेका छन्।

साथै, सकारको नीति तथा कार्यक्रम ‘हावादारी’ भएको सभापतिहरुको ठहर छ। आज (शनिबार) १३ जिल्ला सभापतिहरुले गरेको अनलाइन छलफलमा नीति तथा कार्यक्रम जनताका जनजीविकाका सवालमा मौन रहेको भन्दै हावादारीको संज्ञा दिएका हुन् ।

यसैगरी जिल्ला सभापतिहरुले संकटको यस घडीमा काँग्रेसको भूमिका अझै प्रभावकारी बनाउन उनीहरुले केन्द्रीय नेतृत्वलाई समेत आग्रह गरेका छन् ।

जनताको स्वास्थ्य जस्तो संवेदनशील कुरालाई लिएर सरकारले गरेका गम्भीर त्रुटिलाई काँग्रेसले सहमति मात्रै नजनाएर खबरदारी गर्न उनीहरुले केन्द्रीय नेतृत्वलाई आग्रह गरेका छन् ।

उनीहरुले लकडाउनले मात्रै समस्या समाधान हुन नसक्ने भन्दै पीसीआर परीक्षणलाई व्यापक बनाउन पनि सरकारसँग माग गरेका छन् ।