पूर्व स्वीकृतबिना कामदार पठाउन खोज्ने म्यानपावरमा विभागको छापा

काठमाडौं : वैदेशिक रोजगार विभागले मागपत्र र पूर्व स्वीकृतविना नेपाली कामदार पठाउन खोज्ने म्यानपावर कम्पनीमा छापा मारेको छ। सोमबार टर्कीका विभिन्न कम्पनीमा ड्राइभरका लागि पठाउने भन्दै अन्तर्वार्ता भइरहेको अवस्थामा छापा मारेको विभागले जनाएको छ।

कामदारलाई अन्तर्वार्ता र ट्रायल गराई विदेश पठाउन लागेको सूचनाको आधारमा छापा मारिएको थियो। टर्की पठाउन खोजिरहेको मास्टर जब प्रालिमा विभागले छापा मारेको हो।

छापा मारेर महत्त्वपूर्ण कागजपत्र नियन्त्रणमा लिएको विभागका सूचना अधिकारी कुष्णप्रसाद भुसालले जानकारी दिए। छापा मार्ने क्रममा ३० जनासँग अन्तर्वार्ता लिइरहेको थियो। विभागको टोलीले त्यस सम्बन्धी कागजात बरामद गरी आवश्यक कारबाहीका लागि थप अनुसन्धान गरिरहेको छ।