पाेर्चुगल पठाइदिन्छु भन्दै ४ जनाबाट २७ लाख रुपैयाँ ठग्ने व्यक्ति पक्राउ

काठमाण्डाै – पोर्चुगल पठाइदिन्छु भन्दै चार जनाबाट २७ लाख रुपैयाँ ठगी गर्ने एक जनालाई महानगरीय अपराध महाशाखाले पक्राउ गरेको छ ।

उमेश अधिकारीसहित चार जनालाई पोर्चुगल पठाउने र मासिक एक लाख रुपैयाँ कमाइ हुने प्रलोभनमा पारि ठगी गर्ने झापाको कन्काई नगरपालिका ७ घर भइ भक्तपुर गठ्ठाघर बस्ने ३८ वर्षीय सञ्जिव आचार्यलाई महाशाखाले पक्राउ गरेको हो । उनले पोर्चुगल जान प्रतिव्यक्ति १२ लाख रुपैयाँ लाग्ने बताउँदै आएका थिए ।

२७ लाख रुपैयाँ लिएर फरार भएका आचार्यलाई पक्राउ गर्न वैदेशिक रोजगार विभागले प्रहरीलाई पत्राचार गरेपछि गठ्ठाघरबाट पक्राउ गरि थप अनुसन्धान तथा कारबाहीका लागि विभागमै पठाइएको प्रहरीले जनाएको छ ।