प्रज्ञा प्रतिष्ठानमा भएका नियुक्तिप्रति जसपाको आपत्ति

काठमाडौं : जनता समाजवादी पार्टी (जसपा) ले तीन प्रज्ञा प्रतिष्ठानमा सरकारले हालै गरेको नियुक्तिप्रति आपत्ति जनाएको छ।

राज्यका संरचना, निकाय र आयोगमा नियुक्ति गर्दा जातीय/सामुदायिक समानुपातिक समावेशिताका आधारमा गर्नुपर्नेमा त्यसको मर्मविपरीत एकल जातीय प्रभुत्व र वर्चस्वलाई प्राथमिकता पारेको भन्दै जसपाले विरोध जनाएको हो। उसले तत्काल निर्णय सच्याएर समावेशिताको मर्म अनुकुल हुनेगरी प्राज्ञ नियुक्त गर्न पनि माग गरेको छ।

‘संस्कृति, पर्यटन तथा नागरिक उड्डयन मन्त्रालयले नेपाल प्रज्ञा प्रतिष्ठान, ललितकला प्रज्ञा प्रतिष्ठान र संगीत तथा नाट्य प्रज्ञा प्रतिष्ठानमा गरेको उपकुलपति र प्राज्ञको नियुक्तिप्रति जनता समाजवादी पार्टी, नेपालको गम्भीर ध्यानाकर्षण भएको छ’, उसले भनेको छ, ‘संविधानको मर्म र भावना तथा समावेशिताको सिद्धान्तविपरीत गरिएका नियुक्ति सच्याई समानुपातिक समावेशlताको मर्म अनुकुल हुनेगरी नियुक्ति गर्न जनता समाजवादी पार्टी, नेपाल सरकारसँग जोडदार माग गर्दछ।’

सरकारले गत मंगलबार नेपाल प्रज्ञा प्रतिष्ठान, ललितकला प्रज्ञा प्रतिष्ठान र संगीत तथा नाट्य प्रज्ञा प्रतिष्ठानका कुलपति, उपकुलपति र प्राज्ञ नियुक्त गरेको थियो।