राष्ट्रपतिको मतदान सकियो, चार बजेदेखि मतगणना

काठमाडौं : नयाँ राष्ट्रपति चयनका लागि मतदानको समय सकिएको छ। आज बिहान १० बजेदेखि दिउँसो ३ बजेसम्मका लागि मतदानको समय तोकिएको थियो।

राष्ट्रपति तथा उपराष्ट्रपति निर्वाचनका लागि स्थापना गरिएको निर्वाचन कार्यालयले दिएको जानकारीअनुसार संघीय र प्रदेश सांसद गरी ५१ जना मतदानमा अनुपस्थित रहे।

त्यस्तै, राष्ट्रिय प्रजातन्त्र पार्टी राप्रपा र नेपाल मजदुर किसान पार्टी नेपकिपाका सांसदले भोट हालेनन्। मतदान सकिएसँगै आजै दिउँसो चारबजेबाट मतगणना सुरु गरिने निर्वाचन कार्यालयले जनाएको छ।

राष्ट्रपति निर्वाचनमा एमालेबाट सुवासचन्द्र नेम्वाङ र आठदलीय गठबन्धनबाट रामचन्द्र पौडेल उम्मेदवार छन्। निर्वाचित हुन कुल मतको ५० प्रतिशतभन्दा बढी मत प्राप्त गर्नुपर्छ। ५० प्रतिशत मत कटाउन नसके पुनः निर्वाचन गर्नुपर्ने कानुनी व्यवस्था छ। राष्ट्रपतिको चुनावको कुल मतभार ५२ हजार ६२८ तय भएको छ।

पहिलो चरणको चुनावबाट विजय बन्नका लागि प्राप्त गर्ने बहुमत २६ हजार ३१५ चाहिन्छ।