मेयरको एसइई दिँदै गरेका ज्वाइँ पक्राउ

रौतहट : रौतहटमा एकजना नक्कली परीक्षार्थी पक्राउ परेका छन्। रौतहटको देवाही गोनाही नगरपालिकाका नगरप्रमुख (मेयर) प्रेमलाल साहको साटो उनकै ज्वाइँले एसइई परीक्षा दिँदै गर्दा पक्राउ परेका हुन्।

लक्ष्मीनिया मावि मौलापुर परीक्षा केन्द्रमा नगरप्रमुख साहको साटो उनका ज्वाइँ रौतहटको गरुडा नगरपालिका वडा नं-६ पोठियाहीका कमल साहले परीक्षा दिँदै गरेको अवस्थामा पक्राउ परेका हुन्।

साहले एसइई परीक्षामा नियमिततर्फ सिम्बोल नं. ३५०३७२८ का विद्यार्थी प्रेमलाल साहको साटो परीक्षा दिइरहेका कमल साहलाई परीक्षा अनुगमन गर्न गएको टोलीले पक्राउ गरेको जनाएको हो। ससुराको साटो परीक्षा दिइरहेका उनी इन्जिनियर रहेको स्रोतले जनाएको छ।

परीक्षा सञ्चालन भएको अवस्थामा अनुगमन टोलीलाई विद्यार्थीप्रति शंका लागेर चेकजाँच गर्दा साह पक्राउ परेका हुन्। पक्राउ परेका नक्कली परीक्षार्थीको विषयमा भेरिफिकेशन भइरहेको र त्यस सम्बन्धमा गहन अनुसन्धान भइरहेको जिल्ला प्रशासन कार्यालय रौतहटले जनाएको छ।