बोल्ने शब्द नभेटेपछि ‘गणतन्त्र जोगाउन’ भन्ने परिपाटी आयो : नेता रिजाल

काठमाडौँ : नेपाली कांग्रेसका नेता डा. मिनेन्द्र रिजालले वर्तमान सत्ताधारी दललाई आलोचना गर्दा गणतन्त्र नै नास हुन थाल्यो भन्ने मानसिकता पलाएको बताएका छन्।

मंगलवार काठमाडौँमा आयोजित एक कार्यक्रमलाई सम्बोधन गर्दै उनले यस्तो बताएका हुन्। उनले कसैले कसैको आलोचना गर्दा गणतन्त्र नै नास हुन थाल्यो भन्ने मानसिकताबाट गणतन्त्र नजोगिने बताए।

जनताको विचारलाई आमसञ्चारको रुपमा प्रचार गरे मात्रै पनि गणतन्त्रको रक्षा हुने उनको जिकिर थियो। उनले गणतन्त्र सबैको साझा भएकाले जिम्मा कुनै एउटा संस्थाले लिनुपर्ने आवश्यकता नरहेको बताए।

बोल्ने शब्दहरु नभेटिएपछि गणतन्त्र जोगाउन भन्ने परिपाटी देखिएको र त्यो राम्रो नभएको उनले बताए। नेता रिजालले आफू २०६२/०६३ सम्म पनि राजतन्त्र अन्त्यको पक्षमा नभइ निरंकुशता अन्त्यको पक्षमा रहेको स्मरण गरे।