नेपाल टेलिभिजन स्थापनाको ३९ वर्ष पूरा

१७ माघ, काठमाडौं : नेपाल टेलिभिजन स्थापनाको ३९ वर्ष पूरा भएको छ।

विश्वमा टेलिभिजन प्रसारण प्रारम्भ भएको करिब पाँच दशकपछि नेपालमा पहिलो पटक नेपाल टेलिभिजनको स्थापना भयो। २०४१ साल माघ १७ गते परियोजनाका रुपमा स्थापित नेपाल टेलिभिजनले २०४२ साल साउन २९ गते पहिलोपटक परीक्षण प्रसारण सुरु गरेको थियो।

२०४२ साल पुष १४ गतेदेखि दैनिक दुइ घण्टाबाट प्रसारण प्रारम्भ गरेको नेपाल टेलिभिजनका हाल पाँचवटा च्यानलहरु नेपाल टेलिभिजन, एनटिभी प्लस, एनटिभी न्यूज, एनटिभी इटहरी र एनटिभी कोहलपुर हाल २४ सै घण्टा प्रसारणमा छन्।

प्रसारण प्रारम्भको दिनमा १० मिनेटको समाचार प्रसारण गरेको नेपाल टेलिभिजनले हाल समाचार च्यानलबाट दैनिक १६ वटा लाईभ र छ वटा रेकर्डेड गरी २१ वटा समाचार बुलेटिन प्रसारण गरिरहेको छ।

नेपाल टेलिभिजनले सबै जाती, भाषा, धर्म, क्षेत्र, वर्ग र समुदायको भावना समेट्ने गरी राजनीतिक, आर्थिक, सामाजिक, शैक्षिक र स्वास्थ्य, खेलकूद, मनोरञ्जन लगायतका विषयवस्तुलाई प्राथमिकता दिने गरेको छ।