म्याग्दीमा कालीगण्डकी नदीको कटान रोक्न नयाँ प्रविधिको पक्की पर्खाल निर्माण

म्याग्दी – म्याग्दीको सदरमुकाम बेनीमा कालीगण्डकी नदीको कटान रोक्न नयाँ प्रविधिको पक्की पर्खाल अर्थात् ‘काउन्टर फोर्ट’ पर्खाल निर्माण गरिएको छ । रुपा ताल संरक्षण परियोजनामार्फत बेनी नगरपालिका–७ मा रहेको म्याग्दी जेसिजको भवनबाट वडा नम्बर–८ म्याग्दी उद्योग वाणिज्य सङ्घको भवन पछाडिसम्म कालीगण्डकी नदी किनारमा नयाँ प्रविधिको पक्की पर्खाल निर्माण भएको हो ।

यो योजनाका लागि नौ करोड ५६ लाख रुपैयाँमा २०७८ साल पुसमा रौताह–बिएनबी जेभीले ठेक्का सम्झौता गरेको थियो । कालीगण्डकीको कटानबाट उच्च जोखिम रहेको क्षेत्रमा एक सय ४० मिटर लम्बाइ भएको पक्की पर्खाल र ३० मिटर ग्राभेटी प्रविधिको पर्खाल निर्माण गर्ने काम सकिएको रौताह–बिएनबी जेभीका प्रतिनिधि राजकुमार श्रेष्ठले बताउनुभयो ।

उहाँकाअनुसार नदी किनारमा १४ मिटर फराकिलो जग ढलान गरी ३२, १६ र १२ एमएमको गोलाइ भएका रडहरू प्रयोग गरी दुई मिटरमाथिबाट ५० सेन्टिमिटर बाक्लो र आठ मिटर अग्लो पक्की पर्खाल निर्माण गरिएको छ । पर्खाल निर्माणका लागि कालीगण्डकी नदीलाई डाइभर्सन गरिएको थियो ।

म्याग्दी र कालीगण्डकी नदीको दोभानमा रहेको बेनी बजारलाई सरकारले नदी कटानका हिसाबले जोखिमयुक्त जिल्ला सदरमुकामको सूचीमा राखेको छ । परियोजनाले बेनी बजार र आसपासका बस्तीमा कटान नियन्त्रणका लागि गएको वर्ष एक अर्ब रुपैयाँभन्दा धेरैको विस्तृत परियोजना प्रतिवेदन तयार पारेर स्वीकृत भएको थियो ।