लेबनानमा इजरायली हवाई आक्रमण, ११ जनाको मृत्यु

एजेन्सी

दक्षिणी र पूर्वी लेबनानमा इजरायली हवाई आक्रमणमा ११ जनाको मृत्यु हुनुको साथै अन्य नौ जना घाइते भएको लेबनानको राष्ट्रिय समाचार एजेन्सी (एनएनए) ले जनाएको छ। इजरायली लडाकु विमानहरूले पूर्वी शहर बालबेकमा शृङ्खलावद्ध हवाई आक्रमणहरू गरेका थिए।

एउटा हमलाले अल–शाब छिमेकमा रहेको दुई तले भवनलाई निशाना बनाएको थियो। जसमा नौ जनाको मृत्यु भएको थियो र पाँचजना घाइते भएका थिए। इस्लामिक हेल्थ अथोरिटी र सिभिल डिफेन्सका उद्धार टोलीहरूले भग्नावशेष हटाउन र बाँचेको खोजी गर्ने प्रयास जारी राखेका छन्।

यसअघि इजरायली लडाकु विमानहरूले दक्षिणी शहर नाबातीह र वरपरका क्षेत्रहरूमा १६ वटा हवाई आक्रमणहरू गरेका थिए। नाबतीहमा भएको हवाई आक्रमणमा दुई जनाको मृत्यु भएको छ र चारजना घाइते भएका छन्।